कोण्या खिन्न मध्यरात्री
जीर्ण वडाच्या आदिम ढोलीत
घुत्कारणाऱ्या जर्जर घुबडाच्या साक्षीने
तुझ्या काळ्याकभीन्न देहात
अनंत प्रकाशपारंब्यांनी
कुणी केलय हे तेजाच बीजारोपण.
जात्याच सुगंधी मलमली मनाची तू
आता लवलवती आगिनपात कशी होऊ बघतेस??
ह्या कुठल्या स्थित्यंतराच्या उंबरठयावर उभीयेस
जिथे तुला मायांगात रॉड टाकण्याची
वा डोक्यात घुसणाऱ्या
भिरभिरत्या गोळीचीही भीती वाटत नाही??
काल शुभ्र कबूतरांचा थवा
गवतबीज टीपत कुजबुजतांना बघितलाय मी
लवकरच सूर्योदय होणारेय म्हणे....
( सूर्योदयाच्या कविता)
महेंद्र गौतम.